Midowga Yurub Oo Madaxweyne Rayaale U Soo Diraya Ergo Diblomaasiyadeed Oo Ku Qancisa Inuu Ka Noqdo .

(Kordhi News) Thursday, August 06, 2009
"Madaxweyne Rayaale Ma Ka Noqon Doonaa Go’aankiisii Adkaa Mise Wuxuu Sii Muqaaran Doonaa Mawjado Diblomaasiyadeed? "


Midowga Yurub, ayaa maalmaha soo socda ergo diblomaasiyadeed u soo diraya magaalada Hargeysa, si ay ula xaajoodaan madaxda Somaliland.iyadeed? "


Ilo diblomaasiyadeed ayaa xalay Geeska Afrika u xaqiijiyay inay maalmaha soo sodca magaalada Hargeysa soo gaadhi doonaan ergo culus oo loo soo diray Madaxweyne Daahir Rayaale Kaahin iyo koomishanka doorashooyinka qaranka, si ay ugu qanciyaan inay ka noqdaan go’aanka ay ku laaleen liiskii diiwaangelinta cod bixiyaasha. Ergadaas oo uu warku sheegay inuu hoggaamin doono safiirka dalka Sweden u fadhiya magaalada Nayrobi ee Keny kana soo socdaalaya isla magaaladaas, ayaa waxa ay Madaxweyne Daahir Rayaale Kaahin la yeelan doonaan kulan ujeedadiisu tahay inay ku qanciyaan inuu dib u eego go’aankiisaas. Sidoo kale waxa ay kulan la yeelan doonaan guddiga doorashooyinka qaranka oo ay iyagana kala hadli doonaan isla qodobka ay Madaxweynaha kala hadlayaan. Ergadan diblomaasiyiinta ah ayaa waxa sidoo kale la filayaa inay la kulmaan shirguddoonka Wakiilada iyo Guurtida. Ilahan xogogaalka ahi waxa ay Geeska Afrika u sheegeen in ergadan laga soo abaabulay xarunta Midowga Yurub ee Brussless ee dalka Beljam, waxaanay warbixinta ay kala noqdaan Hargeysa u gudbin doonaan Wasiirka Arrimaha dibadda ee Midowga Yurub.

Weftigan ergada ah ee uu hoggaaminayo safiirka Sweden, oo iyadu hadda haysa tallada midowga Yurub, waxa kale oo ay la kulmi doonaan ururada bulshada rayidka ah, oo ay kala sheekaysan doonaan hanaanka geedi socodka Dimuqraadiyadeed ee Somaliland.

Wadamada deeq bixiyayaasha ah ee taageera doorashooyinka Somaliland, ayaa ka cadhooday go’aankii ay guddiga doorashooyinka Somaliland ku laaleen liiskii diiwaangelinta, taas oo uu Madaxweyne Rayaalena ku taageeray, waxaanay magaalada Nayrobi ku martiqaadeen hoggaamiyayaasha xisbiyada mucaaradka oo iyagu qaadacay inay gallaan doorasho bilaa diiwaangelin ah.

Lama oga in Madaxweyne Rayaale, aqbali doono ergada reer Yurub oo uu ka noqon doono go’aankiisa adag, waxaana laga warqabaa in Madaxweynuhu dhawaan ku hanjabay inaanu ka noqon doonin go’aankiisa. “Waxaan u sheegay in aanan ka noqonayn go’aankayga ninkii raba in doorashadan uu NGO-gaasi qabto Nairobi ha kaga dab tago.” Ayuu yidhi Madaxweyne Rayaale oo Axadii shirjara’aid ku qabtay xarunta Madaxtooyada ee Hargeysa.