Afhayeen U Hadlay Xafiiska Arrimaha Dibadda Britain Oo Wax Lala Yaabo Ku Tilmaamay Go´aankii Madaxweyne Rayaale

(Hadhwanaagnews) Tuesday, August 04, 2009
Afhayeen U Hadlay Xafiiska Arrimaha Dibadda Britain Oo Wax Lala Yaabo Ku Tilmaamay Go´aankii Madaxweyne Rayaale
London (Hadhwanaagnews.com)-- Afhayeen u hadashay xafiiska arrimaha dibadda iyo barwaaqo sooranka dalka Britain ee loo soo gaabiyo FCO ayaa ku tilmaantay go´aankii dhawaan ka soo baxay Madaxweynaha Somaliland Daahir Rayaale Kaahin mid lala yaabo oo wax u dhimi kara hanaankii dimuqraadiyadda Somaliland "Dawladda Britain waxay xidhiidh wada shaqayneed oo dhaw la leedahay maamulkaasi (Somaliland) oo xasiloona muddadii dhawr iyo tobanka sannadood ahayd ee mandaqadda Soomaaliya dagaalada iyo colaadahu ka jireen, dawladda Britain waxay taageero u fidisa markasta dawladda iyo shacabka Somaliland waxaanu dhawaan bixinay kharash dhan £158,000 oo u dhiganta 250,000 kun oo dollarka maraykanka ah annagoo ku wareejinay guddida doorashada ee somaliland si loo fuliyo hawlahii diiwan gelinta, Britain waxaa ay markasta diyaar ula tahay Somaliland taageero kasta oo loo baahdo si loo xoojiyo nabadgelyada iyo xasiloonida iyo dimuqraadiyadda halkaasi ka hirgelay" ayey tidhi Cathy Smith oo ah haweenay u hadlaysay waaxda arrimaha dibadda iyo barwaaqo sooranka Britain.

Mrs Smith oo ka jawaabaysay go´aankii dhawaan ka soo baxay Madaxweynaha Somaliland ee uu Somaliland kaga musaafuriyey madaxii Haayadda Interpeace oo dalalka deeq-bixiyayaasha ah ee Britain ka midka tahay u xilsaareen inay hubiyaan qaabka ay doorashadu madaxtooyadu u dhacayso ayaa ku tilmaantay go´aan lala yaabo oo ah ayey tidhi in Madaxweynahu dib uga fiirsado "go´aankaasi wuxuu ahaa mid aan u fiicnayn dimuqraadiyadda koraysa ee Somaliland, waa mid khalkhal iyo jahawareer ku ridaya habkii doorashadu u dhici lahayd, waana mid iska hor keenaya qaybahii ku tartamayey doorashada, Britain way la yaabtay go´aankaasi waxaananu Madaxweynaha usoo jeedinayna inuu go´aankaasi dib uga fiirsado"ayey tidhi haweenaydaasi.

Hadalkani ka soo baxay waaxda arrimaha dibadda ee britain ayaa waxaa isaguna dhinac socda qoraal ka soo baxay safaaradda maraykanku ku leedahay magaalada Nairobi ee dalka ingiriiska oo lagaga codsanaayo Madaxweyne Rayaale inuu dib uga noqdo go´aankii uu dalka kaga saaray haayadda Inter Peace.

xidhiidhkii u dhexeeyey dalalkii wada shaqaynta dhaw la lahaa Somaliland ayaa u muuqda inuu dhaawac soo gaadhay ka dib go´aankii Madaxweynaha Somaliland Daahir Rayaale Kaahin ka soo baxay ee uu dalka kaga musaafuriyey haayadii Interpeace.